मध्य अफ्रिकी देश प्रजातान्त्रिक गणतन्त्र कंगोको पूर्वी भागमा रहेको रुबाया कोल्टन खानीमा भीषण पहिरो जाँदा २०० भन्दा बढी मानिसको ज्यान गएको आशंका गरिएको छ। उत्तरी किभु प्रान्तमा रहेको खानी बुधबार भत्किएको हो।
स्थानीय अधिकारीहरूका अनुसार खानी कामदार, बालबालिका र बजारमा रहेका महिलासमेत पहिरोमा परेका छन्। केही घाइतेको उद्धार गरी उपचार भइरहेको छ भने धेरै मानिस अझै खानीभित्र फसेको बताइएको छ। वर्षायामका कारण जमिन कमजोर हुँदा दुर्घटना भएको जनाइएको छ।
रुबाया खानी विश्वको करिब १५ प्रतिशत कोल्टन उत्पादन गर्ने प्रमुख क्षेत्र हो। खानी हाल एम२३ विद्रोही समूहको नियन्त्रणमा रहेको छ। स्वतन्त्र स्रोतबाट मृतकको यकिन संख्या पुष्टि हुन बाँकी रहेको अन्तर्राष्ट्रिय सञ्चारमाध्यमले जनाएका छन्।
