अंकित अधिकारी , अस्ट्रेलियाको सिड्नीस्थित अर्बन क्षेत्रमा रहेको एम ब्रदर्स कबाब शप अगाडि दिउँसोको भीडभाडको समयमा भएको गोलीकाण्डमा दुई पुरुष र एक महिला गम्भीर घाइते भएका छन्। घटनास्थलमा प्रहरीद्वारा क्राइम सिन सेट गरिएको छ भने वरपरका सडकहरू बन्द गरिएका छन्।
सोमबार दिउँसो १:१० बजे दुई नकाबधारी व्यक्तिले रेस्टुरेन्ट अगाडि आठ राउन्ड गोली प्रहार गरेका थिए। २६ वर्षीय एक पुरुषको हात र काँधमा गोली लागेको छ भने अर्का एक व्यक्तिको अनुहारमा गोली लागेको छ। सोही रेस्टुरेन्टमा काम गर्ने ५० वर्षीया महिला कर्मचारीको पेटमा दुई गोली लागेको जनाइएको छ।
“उहाँ त काम गरिरहनुभएको सामान्य महिला हुनुहुन्थ्यो, निर्दोष रुपमा घटनामा मुछिनुभयो,” प्रहरी मन्त्री यास्मिन काट्लीले बताउनुभयो।
“अपराधीहरूबीच झगडा हुँदा उनीहरूलाई कारवाही गर्ने हो, तर निर्दोष नागरिकमा असर परे हामी कदापि सहन सक्दैनौँ।”
तीनै जना घाइतेहरूलाई गम्भीर अवस्थामा अस्पताल लगिएको छ। प्रहरीले महिलासँग कुराकानी गरिसकेको छ।
प्रहरीका अनुसार आक्रमणकारीहरू भवनको पछाडिको अफिसमा पस्न नसकी कालो BMW गाडीमा फरार भएका छन्, जसमा नक्कली नम्बर प्लेट प्रयोग गरिएको थियो।
एनएसडब्लु प्रहरी कार्यवाहक आयुक्त पिटर थर्टलले भने,
“हामीले अनुसन्धानमा सबै सम्भव स्रोत परिचालन गरेका छौं। भीडभाड भएको सडकमा दिउँसोको समयमा तीनजनालाई गोली हानिएको घटना अविश्वसनीय र निन्दनीय छ।”
