काठमाडौं महानगरपालिका प्रहरी प्रमुख राजु पाण्डेले प्रमुख प्रशासकीय अधिकृत सरोज गुरागाईँलाई आफ्नो स्पष्टीकरण बुझाएका छन्। गुरागाईँले पाण्डेलाई एक साताको समय दिँदै जेठ ६ गते स्पष्टीकरण मागेका थिए।
गुरागाईँले चैत २१ गते आफू लामो बिदापछि कार्यालय आउँदा पाण्डेले रोकेको आरोप लगाएका छन्। उनले पाण्डेमाथि महानगर प्रहरीको अनधिकृत परिचालन, अभद्र व्यवहार, गैरकानुनी गतिविधि, प्रमुख प्रशासकीय अधिकृतको सवारी साधन ह्विल लक गर्न आदेश दिएको, कार्यालयको तालाबन्दी गराएको, जनप्रतिनिधिहरूको बाटो छेक्ने जस्ता आरोप लगाएका छन्।
साथै, सञ्चार माध्यममा अनधिकृत अभिव्यक्ति दिएको र उपप्रमुख तथा अन्य जनप्रतिनिधिहरूसँग अमर्यादित व्यवहार गरेको आरोपसमेत लागेको छ। यदि पाण्डेको स्पष्टीकरण चित्त बुझ्दो नभएमा कानुनअनुसार कारबाही गरिने उल्लेख गरिएको छ।
