ऊर्जा, जलस्रोत तथा सिँचाइ मन्त्री दीपक खड्काले हाल देखिएको लोडसेडिङको चर्चा सामाजिक सञ्जालमा फैलिएको हल्ला मात्र भएको बताएका छन्। सिंहदरबारमा आयोजित प्रतिनिधि सभा अन्तर्गतको पूर्वाधार विकास समितिको बैठकमा बोल्दै उनले मर्मतसम्भारका कारण बाहेक अन्य कुनै पनि कारणले लोडसेडिङ नहुने स्पष्ट पारे।
मन्त्री खड्काका अनुसार केही व्यक्तिहरूले विदेशबाट फोन गरेर ‘लोडसेडिङ भएको छ’ भन्ने अफवाह फैलाउने काम गरिरहेका छन्। उनले भने, “रातको १२ बजे विदेशबाट फोन आउँछ, पटक–पटक आउँछ, अनि हामी कहाँ बत्ती गयो भन्छौँ। तर पछि बुझ्दा सबै ठाउँमा बत्ती भइरहेको हुन्छ। यस्तो झूठो प्रचार गरेर जनतालाई दुःख दिने काम भइरहेको छ।”
उनका अनुसार देशमा विद्युत् उत्पादन बढिरहेको छ र आवश्यकता परेमा आयातमार्फत पनि आपूर्ति गरिने भएकाले यस वर्ष लोडसेडिङ नहुनेछ।
