बैशाख १९ शुक्रबार, विदेशमा आकर्षक तलबको प्रलोभन देखाएर विभिन्न देशहरूमा रोजगारीको नाममा लाखौँ रुपैयाँ ठगी गरेको आरोपमा प्रहरीले चार जनालाई पक्राउ गरेको छ।
पक्राउ पर्नेहरूमा ललितपुर महालक्ष्मी नगरपालिका–५ का ३९ वर्षीय सम्पूर्ण केसी, काभ्रेपलाञ्चोक पाँचखाल नगरपालिका–३ का २९ वर्षीय सुजन गिरी, पाल्पा रम्भा गाउँपालिका–५ का ५८ वर्षीय शिरबहादुर बराल र काठमाडौँ तार्केश्वर नगरपालिका–४ की ३३ वर्षीया सरस्वती देवकोटा रहेका छन्।
काठमाडौँ उपत्यका अपराध अनुसन्धान कार्यालयका प्रहरी उपरीक्षक मनोहरप्रसाद भट्टका अनुसार सम्पूर्णले बेलायत पठाइदिने भन्दै ३५ लाख रुपैयाँ, सुजनले बेलायतका लागि २६ लाख ६५ हजार, शिरबहादुरले दक्षिण कोरियाका लागि ७ लाख ५० हजार र सरस्वतीले युएईका लागि १ लाख रुपैयाँ लिएर सम्पर्कविहीन भएको उजुरीका आधारमा उनीहरूलाई पक्राउ गरिएको हो।
पक्राउ परेका व्यक्तिहरूलाई काठमाडौँका विभिन्न स्थानबाट पक्राउ गरी थप अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौँमा पठाइएको प्रहरीले जनाएको छ।
स्रोत: राष्ट्रिय समाचार समिति (RSS)
