काठमाडौं — भारतीय नृत्याङ्गना तथा अभिनेत्री नोरा फतेहीले नेपाली कलाकारहरूसँगै हिजो बौद्धस्थित पाँचतारे हायात होटलको ग्राउन्डमा भव्य प्रस्तुति दिइन्। नेपाली कलाकारहरू दुर्गेश थापा, तेरिया फौजामगर, समर्पण लामा लगायतको साथमा भएको प्रस्तुतिले कार्यक्रम स्थललाई रौनकमय बनायो।
‘ह्युमन रेस्पेक्ट नेपाल’को सहयोगार्थ आयोजित नोरा फतेही लाइभ इन नेपाल कार्यक्रममा नोरा फतेहीले आफ्नो २३ सदस्यीय टोलीसँग विभिन्न चर्चित बलिउड गीतहरूमा धमाकेदार नृत्य प्रस्तुत गरेकी थिइन्। उनले दर्शकहरूलाई पनि नचाउँदै माहोल उत्साहपूर्ण बनाएकी थिइन्।
कार्यक्रमको लागि नोरा शनिबार त्रिभुवन अन्तर्राष्ट्रिय विमानस्थल हुँदै काठमाडौं आएकी थिइन्। नेपालमा पहिलोपटक प्रस्तुति दिन पाउँदा आफू उत्साहित रहेको उनले विमानस्थलमा बताएकी थिइन्। उनका नृत्य टोलीका अन्य सदस्यहरू शुक्रबार नै काठमाडौं आइपुगेका थिए।
