रुपन्देही, वैशाख २९: २५६९औं बुद्ध जयन्तीको अवसरमा लुम्बिनीमा विभिन्न कार्यक्रमसहित भव्यरूपमा उत्सव मनाइँदैछ। लुम्बिनी विकास कोषले मे ११ देखि १३ सम्म विविध कार्यक्रमहरूको आयोजना गरिरहेको छ।
कोषका कोषाध्यक्ष धु्रविराज भट्टराई (सिद्धिचरण) का अनुसार आइतबार कपिलवस्तुमा बुद्ध मूर्ति प्रदर्शनी, पण्डितपुर, रामग्राम र नवलपरासीमा खेलकुद तथा सांस्कृतिक कार्यक्रम सम्पन्न भएका छन्। साथै, मायादेवी मन्दिर परिसरमा महापरित्राण पाठ सुरु भएको छ।
आज (सोमबार) बिहान भिक्षु, भिक्षुणी, लामा गुरु तथा श्रद्धालुहरूको सहभागितामा प्राथर्ना सभा, शोभा यात्रा र मुख्य समारोह आयोजना हुँदैछ। कपिलवस्तु र नवलपरासीमा समेत बुद्धसम्बन्धी कार्यक्रमहरू सञ्चालन भइरहेका छन्।
प्रधानमन्त्री केपी शर्मा ओली आज लुम्बिनी आइपुग्ने कार्यक्रम तय भएको छ। लुम्बिनी विकास कोषका उपाध्यक्ष डा. लार्क्याल लामाका अनुसार मुख्य समारोह प्रधानमन्त्रीको उपस्थितिमा सम्पन्न हुनेछ।
