काठमाडौं : नेपाल प्रहरीको जवान पदका लागि लिइँदै गरिएको परीक्षामा नक्कली परीक्षार्थीको रूपमा पक्राउ परेका गोपालबहादुर शाही अमृत साइन्स क्याम्पस (अस्कल) का स्ववियु सचिव भएको पत्ता लागेको छ। उनी चैत १० गते एमालेनिकट अनेरास्ववियु प्यानलबाट स्ववियु सचिवमा निर्वाचित भएका थिए।
जिल्ला प्रहरी परिसर काठमाडौंका प्रवक्ता एसपी अपीलराज बोहोराका अनुसार शाहीसहित ६ जनालाई नयाँ बानेश्वरस्थित रत्नराज्य माविमा चलिरहेको परीक्षामा अरूको नाममा परीक्षा दिइरहेको अवस्थामा पक्राउ गरिएको हो।
पक्राउ पर्नेहरूमा कालीकोटका गोपालबहादुर शाही, दोलखाका मोहन सुनुवार, सुर्खेतका मनोज शर्मा र उमेश शर्मा, दैलेखका आकाश खड्का र जुम्लाकी मीन रावल रहेका छन्। उनीहरूविरुद्ध काठमाडौं जिल्ला अदालतबाट पाँच दिनको म्याद थप गरी अनुसन्धान अघि बढाइएको प्रहरीले जनाएको छ।
त्यसैगरी, शनिबार पोखराको लोकसेवा आयोग परीक्षा भवनमा आरतीकुमारी मण्डलको नाममा परीक्षा दिइरहेकी ज्ञानुता विश्वकर्मालाई पनि प्रहरीले पक्राउ गरेको छ।
