बैशाख २४, गौतमबुद्ध अन्तर्राष्ट्रिय विमानस्थलमा अन्तर्राष्ट्रिय उडान पुनः सञ्चालन गर्न माग गर्दै उद्योग व्यापार सङ्गठन रुपन्देही (रुपन्देही चेम्बर अफ कमर्स) को अगुवाइमा विरोधसभा र धर्ना कार्यक्रम आयोजना गरिएको छ ।
पछिल्लो समय विमानस्थल अन्तर्राष्ट्रिय उडानविहीन बनेपछि निजी क्षेत्र गम्भीर संकटमा परेको भन्दै आयोजकहरूले प्रतीकात्मक रूपमा दिनको एक घण्टा धर्ना दिएका हुन्। संस्थाका अध्यक्ष दर्पण श्रेष्ठले अन्तर्राष्ट्रिय उडान ठप्प हुँदा व्यापार, पर्यटन र स्थानीय अर्थतन्त्रमा गम्भीर असर परेको बताए।
विरोध कार्यक्रममा सिद्धार्थ सञ्जाल, लुम्बिनी इँटा व्यवसायी सङ्घ, ट्राभल्स एण्ड टुर अपरेटर्स नेपाल, नेपाल भन्सार एजेन्ट सङ्घ, ट्रक यातायात व्यवसायी सङ्घ, सहकारी सञ्जाल, वैदिक सनातन धर्म सेवा समिति, नेवा खलः, किराना तथा प्लास्टिक व्यवसायी सङ्घ लगायतका दर्जनौँ संघसंस्थाहरू ब्यानरसहित सहभागी थिए।
विमानस्थलका सूचना अधिकारी विनोद राउतका अनुसार केन्द्रबाट उडान पुनः सुरु गर्न पहल भए पनि कुन एयरलाइन्सले कहिलेबाट सेवा सुरु गर्ने भन्ने विषय अझै स्पष्ट भइसकेको छैन।
