विराटनगर — सुनसरीको बराहक्षेत्रस्थित सप्तकोशी नदीमा नुहाउन गएका दुई जना सोमबार बिहानदेखि बेपत्ता भएका छन्। बेपत्ता हुनेमा खोटाङको केपिलासगढी गाउँपालिका–४ निवासी ४० वर्षीय नवराज बास्तोला र इटहरी–१६ निवासी १६ वर्षीय जेनिस आचार्य रहेका छन्।
जानकारी अनुसार ती दुई जना मामा–भान्जा हुन्। उनीहरू परिवारसँग बराहक्षेत्र मन्दिरमा पूजाका लागि गएका थिए र नुहाउने क्रममा नदीको भेलमा परेर बेपत्ता भएका हुन्।
सशस्त्र प्रहरी बलका सह–प्रवक्ता डीएसपी शैलेन्द्र थापाका अनुसार खोजीका लागि गोताखोर टोली परिचालन गरिएको छ। चतरास्थित सशस्त्र प्रहरी बल नेपाल सुरक्षा बेसको टोली खोजीमा खटिएको छ भने सशस्त्र प्रहरी बलको नम्बर १ बराह बाहिनी मुख्यालयबाट थप सहयोगी टोली पनि पठाइएको छ।
सुनसरीका प्रहरी प्रमुख एसपी सुमनकुमार तिम्सिनाले नेपाल प्रहरी, सशस्त्र प्रहरी तथा स्थानीय बासिन्दाहरूको सहयोगमा ती दुई जनाको खोजी कार्य जारी रहेको जानकारी दिएका छन्।
