काठमाडौं । सरकारले भारतसहित विभिन्न ६ देशमा कार्यरत नेपाली राजदूतलाई फिर्ता बोलाउने निर्णय गरेको छ। मन्त्रिपरिषद्को पछिल्लो निर्णयअनुसार राजनीतिक नियुक्तिका आधारमा पठाइएका राजदूतहरूलाई फिर्ता बोलाइएको हो।
फिर्ता बोलाइएकामध्ये भारतका लागि नेपाली राजदूत डा. शङ्करप्रसाद शर्मा रहेका छन्। त्यसैगरी दक्षिण कोरियाका लागि डा. शिवमाया तुम्बाहाङ्फे, अस्ट्रेलियाका लागि चित्रलेखा यादव, श्रीलङ्काका लागि डा. पूर्णबहादुर नेपाली, डेनमार्कका लागि सुमिना तुलाधर र दक्षिण अफ्रिकाका लागि कपिल श्रेष्ठ पनि समावेश छन्।
यी राजदूतहरू केपी शर्मा ओली नेतृत्वको अघिल्लो सरकारले नियुक्त गरेका थिए। नयाँ सरकारले राजनीतिक नियुक्ति लिएकाहरूलाई मार्गप्रशस्त गर्न आग्रह गरे पनि उनीहरूले राजीनामा नदिएपछि फिर्ता बोलाउने निर्णय गरिएको हो।
यस निर्णयसँगै हाल १७ देशका नेपाली दूतावास राजदूतविहीन भएका छन्। परराष्ट्र मन्त्रालयले रिक्त पदहरूमा चाँडै नयाँ राजदूत नियुक्त गर्ने तयारी भइरहेको जनाएको छ। फिर्ता बोलाइएका राजदूतहरूलाई एक महिनाको समय दिइएको छ।
