काठमाडौं — राजधानी काठमाडौंमा आज बिहानैदेखि लगातार वर्षा भइरहेको छ। बङ्गालको खाडीबाट आउने जलवाष्पयुक्त हावाको प्रभावका कारण देशका विभिन्न भागहरूमा वर्षा भइरहेको मौसमविद्हरूले जनाएका छन्।
काठमाडौंमा हल्का वर्षा भइरहे पनि आकाश घमिलो र धुम्म रहेको छ। यस्तो प्रतिकूल मौसमका कारण आन्तरिक तथा अन्तर्राष्ट्रिय हवाई उडानहरूमा अवरोध पुगेको छ। काठमाडौँबाट विभिन्न गन्तव्यतर्फका उडानहरू ढिलाइ भएका छन्।
मौसमविद्हरूले आगामी दुई दिनसम्म देशका धेरैजसो स्थानमा बदली र वर्षाको सम्भावना रहेको बताएका छन्। बागमती, कोशी, र मधेस प्रदेशका जिल्लाहरूमा बिहानैदेखि वर्षा जारी छ।
त्यस्तै, लुम्बिनी र सुदूरपश्चिम प्रदेशको तराई क्षेत्रमा हावाहुरीको सम्भावना रहेकोले मौसम पूर्वानुमान महाशाखाले सतर्क रहन सर्वसाधारणलाई आग्रह गरेको छ।
