नेपाली कांग्रेसका महामन्त्री गगनकुमार थापाले पार्टीभित्र बढ्दो गुटबन्दी अन्त्य गर्नका लागि नयाँ र ठोस प्रस्ताव अघि सारेका छन्। काठमाडौंको प्रदेशसभा क्षेत्र नं. ६ (प्रदेश ‘क’) को तेस्रो सम्मेलन तथा प्रशिक्षण कार्यक्रममा बोल्दै थापाले सबै क्रियाशील सदस्यबाट सभापति छान्ने व्यवस्था गरिनुपर्ने बताएका छन्।
उनका अनुसार, कांग्रेसमा हाल ८ लाख ६६ हजार क्रियाशील सदस्य छन् र नवीकरणपछि यो संख्या करिब १२ लाख पुग्नेछ। यिनै १२ लाख सदस्यले प्रत्यक्ष रूपमा पार्टी सभापति छान्ने व्यवस्था गरिए गुटबन्दी स्वतः समाप्त हुने उनले दाबी गरे।
“सिधै ती १२ लाख सदस्यबाट सभापति चयन गरौँ, जसले गुट बनाउँछ त्यो समाप्त हुन्छ,” उनले भने, “नत्र गुट त बन्छ, जति भाषण गरे पनि।”
थापाले आगामी मंसिर २०८३ भित्रै कांग्रेसको १५औं महाधिवेशन सम्पन्न हुने दाबीसमेत गरे। उनले स्पष्ट पारे, “कसैले सोच्नुभएको छ भने कि निर्वाचनपछि मात्र महाधिवेशन हुन्छ, त्यो गलत हो। २०८३ मंसिरअघि नै अधिवेशन हुनेछ।”
