उपप्रधानमन्त्री तथा अर्थमन्त्री विष्णुप्रसाद पौडेलले संविधान संशोधन कुनै बहुमत र अल्पमतको विषय नभई सबैको सहमतिमा हुनुपर्ने बताएका छन्। उनले संविधान समयअनुसार परिमार्जन गर्न सकिने दस्तावेज भएकोले सबै दलबीच छलफलबाट अगाडि बढ्नुपर्ने बताए।
पौडेलले हालको बजेट, मौद्रिक नीति र कानुनी सुधारमार्फत देशको आर्थिक विकास अगाडि बढ्ने विश्वास व्यक्त गरे। विदेशी लगानीमैत्री वातावरण बनाउन आवश्यक कानून र नीति परिमार्जन गरिएको उनले बताए।
उनले प्रतिपक्षको व्यवहार अपरिपक्व भएको भन्दै तथ्य र तर्कका आधारमा संसदमा प्रस्तुत हुनुपर्नेमा जोड दिए। संघीयताको कार्यान्वयनलाई बलियो बनाउनेतर्फ सरकारले प्रयास गरिरहेको र अझ सुधार गर्ने प्रतिबद्धता रहेको बताए।
राजतन्त्रको कुरा उठाइनु पछाडि फर्कने प्रयास हो भन्दै उनले सामाजिक सञ्जालको दुरुपयोग गरेर जनतामा भ्रम फैलाउन नहुने बताए। देशप्रति आशावादी रहनुपर्ने बताउँदै उनले सबैलाई विकास र समृद्धिको यात्रामा साथ दिन अपिल गरे।
