काठमाडौं । नयाँ बानेश्वर क्षेत्र अहिले तनावपूर्ण बनेको छ । विद्यालय शिक्षा ऐन जारी गर्नुपर्ने माग राख्दै २६ दिनदेखि आन्दोलनमा रहेका शिक्षकहरूले नयाँ बानेश्वरस्थित निषेधित क्षेत्र पार गर्न खोजेपछि प्रहरीले पानीको फोहोरा प्रयोग गरेको हो।
जिल्ला प्रहरी परिसर, काठमाडौंका एसपी अपीलराज बोहोराका अनुसार आन्दोलनकारीहरूले प्रहरीको ब्यारिकेड तोड्न खोजेपछि पानीको फोहोरा प्रयोग गरिएको हो। उनले सञ्चारकर्मीहरूसँग भने, “ब्यारिकेड हटाउन खोजेपछि पानीको फोहोरा प्रयोग गरिएको हो, अहिलेसम्म अवस्था नियन्त्रणमै छ र कुनै अप्रिय घटना घटेको छैन।”
शिक्षक महासंघले सरकारसँग वार्ता असफल भएपछि काठमाडौंमा केन्द्रित सडक आन्दोलनलाई अझ तीव्र पारेको छ। बिहान ११ बजेबाट नयाँ बानेश्वरदेखि माइतीघरसम्मको सडक अवरुद्ध गर्दै उनीहरू आन्दोलित छन्।
