गुल्मीको रेसुङ्गा नगरपालिका–६ सिमाघाट लप्सीमा मोटरसाइकल दुर्घटनामा परेर एक सबइन्जिनियरको ज्यान गएको छ। दाङको गढवा गाउँपालिका–३ गोबडियाका २७ वर्षीय निशान चौधरीको घटनास्थलमै मृत्यु भएको जिल्ला प्रहरी कार्यालय गुल्मीका सूचना अधिकारी डिएसपी गङ्गा बहादुर सारुले जानकारी दिनुभएको छ।
चौधरीले चलाएको लु ९७ प ७४७९ नम्बरको मोटरसाइकल गएराति करिब १०:३० बजे अनियन्त्रित भई सडकछेउको नालीमा खस्दा उनी गम्भीर रूपमा घाइते भइ मृत्यु भएका हुन्। घटनाको समयमा उनी एक्लै सवार थिए।
मृतक चौधरी गुल्मीस्थित इन्द्र एम.के. जे.बी. निर्माण सेवामा सबइन्जिनियरको रूपमा कार्यरत थिए। दुर्घटनाको जानकारी पाएपछि प्रहरी निरीक्षक भूपेन्द्र थापाको नेतृत्वमा प्रहरी टोली घटनास्थल पुगेको थियो। शवलाई पोस्टमार्टमका लागि गुल्मी अस्पताल ल्याउने तयारी भइरहेको छ भने घटनाबारे थप अनुसन्धान भइरहेको प्रहरीले जनाएको छ।
