अख्तियार दुरुपयोग अनुसन्धान आयोगले मधेस प्रदेशको सामाजिक विकास मन्त्रालयमा जनस्वास्थ्य प्रयोगशाला स्थापनाका लागि गरिएका चार विभिन्न खरिद सम्झौतामा ५० करोड रुपैयाँभन्दा बढी भ्रष्टाचार भएको निष्कर्ष निकालेपछि विशेष अदालतमा मुद्दा दायर गरेको छ।
आयोगले मन्त्रालयका तत्कालीन सचिव इमनारायण श्रेष्ठ, तत्कालीन निर्देशक श्रवणकुमार मिश्र र हस्पिटेक इन्टरप्राइजेज प्रालिका सञ्चालक विशाल पण्डितसहित १५ जनाविरुद्ध आइतबार विशेष अदालतमा भ्रष्टाचार सम्बन्धी मुद्दा दायर गरेको हो।
मन्त्रालयले विभिन्न ७२ वटा पालिकामा जनस्वास्थ्य प्रयोगशाला स्थापना गर्न गरेको कन्ट्र्याक्ट नम्बर PPHL-G/NCB/…२०७९/८० लगायतका सम्झौताहरू सार्वजनिक खरिद ऐन, २०६३ विपरीत रहेर गरिएको भन्दै २१ करोड ८९ लाख ३९ हजार ७६० रुपैयाँ अनियमितता र अन्य विभिन्न घटनामा ३० करोड रुपैयाँ अनियमितता भएको ठहर गरिएको छ।
भ्रष्टाचार अभियोगमा परेका अन्य व्यक्तिहरूमध्ये जनस्वास्थ्य प्रयोगशालाका वरिष्ठ ल्याब टेक्निसियन गुणानन्द प्रसाद शाह, ल्याब टेक्नोलोजिस्ट मनमोहन मिश्र लगायत रहेका छन्।
